يادى النيلة
.مش عارف
هو انا قليل البخت
ولا قليل الحيلة
كل ما أقول قربت خلاص
ألاقى السكة لسه طويلة
يادى النيلة
ده انا م الصبح بعدل فيها
بأى وسيلة
و كل ما احاول افرح
تطلع منى الضحكة حزينة
بص بقى هو الحظ
و الدنيا بجد بجد بخيلة
هى الناس مبقتش بتفرح ليه
فى المواسم
حتى كل سنة و انت طيب
بقت تقيلة
و لكن عارف
رغم الخوف و النار
و السكينة
لسه بلدنا
فيها حاجة جميلة
(من جريدة الدستور(منقول)
ياترى لسه بلدنا فيها حاجة جميلة ؟
ولو ايوة لس البلد بخير
امال لية نسبة الهجرة زادت الفترة دى جدا؟
ولية كتير من الشباب بيدفع بنفسه للهلاك و للذل للسفر خارج البلد؟
14 comments:
اول كومينت يا سلام يا سلام
لأ البلد مش لسه بخير ابدا...خير البلد لسه ف قلوب ناسها انما الخير كخير مادى والكلام دا فعلا مش موجود...كنا نقدر نقول الكلمه دى سنة 96 او كدا كنا نقدر نقول ان لسه فيه خير وامل وكنا بنفرح والله لما حاجه جديده ف البلد بتتعمل
لكن قوليلى حد فرح بحكاية المفاعل النووى دا؟؟؟ابدا... كان ممكن نفرح بيه قبل كدا بس دلوقت مستحيل
الهجره والسفر دا امر مفروغ منه من سنين طويله ودوافعه معروفه جدا انما الموضه الجديده مش السفر ...لا الهجره
البوست دا ثرى جدا والكلام فيه مش ح يخلص
بالتوفيق دايما
الهجره دى الناس شبه مجبره عليها
عندى احساس انها طريقه لتطفيش اهل البلد منها عشان تبقى العمليه سهله فى الحكم
مش عارف البلد فى تدهور مستمر لدرجه بقت صعبه أوى
للأسف لسه فى هجره لأن البلد ما بقاش فيها حاجه تخلى الواحد يقعد فيها غير قلوب الناس الطيبه وزكرياته المحفوره
هوا اكيد بلدنا لسه فيها خير
واكيد لسه فيه امل
بس هوات ضعيف جدا
عاوزة تعرفى الناس بتهاجر ليه؟؟؟
تعالى اديكى مثال
شباب خريجى كليات قمة
مثقفين
عندهم مهارات كتير
وطموحات اكتر
ورغبة فى التميز والنجاح
الناس دى مكسور جناحها ليه
وواخد على دماغهم ليه؟؟؟
متعرفيش
لو عرفتى الناس بتهاجر ازاى ابقى قوليلى
عشان احضر ورقى واخلع
:D
تحياتى
مداح القمر
نورتنى نورتنى
هو كلامك سليم مية فى المية
البلد مش لس بخير
خيرها فى قلوب اهلها
و اشمعنا اخترت سنة 96 بالذات؟
اما الموضوع فعلا هو ثرى
لانى عاوزة اتجه لمحور اخر
هيبان فى البوست الى جاى
wa3d-el3yoon
طيب انا معاك و دى ممكن تكون طريقة لتطفيش الناس
بدليل بيع البلد عن طريق الخصخصة و الشغل دة
لكن هو مفيش حلول غير الهجرة ؟
فين دماغنا الى تفكر؟
فين الشباب؟
:
نورتى المدونة
موضوع ان فى امل
طالما فى شباب و فى حرية و لو حتى كانت مقدار الحرية قليل
فى أمل
و سوسن و عمر كمان
و موضوع الامال الضائعة و الطموح المفقودة كل دى انا عارفاها
لكن نسيب بلدنا و نطفش؟
اما موضوع ازاى تهاجرى؟
فلما اعرف هقولك!!!!
بلدنا كويسه بس احنا اللي مش بقينا كويسين احنا بنعمل ف بعض اللي الحكومه بتعمله فينا بنفتري على بعض ونظلم بعض ونستغل بعض وحاجه زفت من الاخر
اما بالنسبه لموضوع الهجره
مش معقول واحد يفضل قاعد قدام ابوه لحد ما يبقى عنده 30 سنه مش لاقي شغل علشان كده الناس بتفضل تدور على اي فرصه بره يمكن تكون البلد اللي يروحها احن عليه من بلده
ومش تقولي ان البلد مليانه شغل
ماتطالبنيش اني اشتغل شغلانه اخد فيها 120 جنيه ومواصلاتي خلال الشهر ضعف ده
مش منطقي
اسف ان كنت سودت قدامك الصوره بس على فكره انا كده مفتحّها على الاخر
فعلا كل حاجه بقت تقيله ونيلة النيلة كمان
الناس مبقتش شايفه قدامها
كل واحد بينام وشايل هم بكره هياكل ولاده منين وازاى
لنا الله
و الله انا نفسى ارد عليكى و اقولك بقلب جامد لسه البلد بخير
لكن كل اللى اقدر اقوله
كل سنة وانتى بخير و البلد بخير
.....
لأ البلد مش بخير خالص دلوقتي
لكن لسة في سوسن و عمر
و أمل
لسة فيها خير لكن في الناس زي ماتقال فوق
و في خير مادي كمان , لكن مسروق و منهوب طبعا
المهم بقى إن الناس اللي فيها خير دي تعمل خير بقى و ترجع الخير اللي اتسرق منها و تطرد الحرامية و أولادهم اللي حيورثوهم !
اللي بيهاجروا دول بقى أكتر ناس زعلان عليهم , و منهم
اللي بيسافروا بمنح للتعليم في الخارج أو الدراسات العليا
أفضل عقول في البلد بتسيبها للأسف
حنقول معلش , البلد ظالماهم و مش عارفين يعيشوا حياة كريمة
ماشي , كن فين الكفاح ؟ فين الجهاد ؟
فين القضية اللي انت متبنيها و عايش عشانها ؟
لو انت هدفك في الحياة انك تاكل و تشرب و تعيش حياة مرفهة نعيم و فلوس و عربيات و فلل
يبقى اتفضل مع السلامة البلد مش عايزة منك حاجة حتى لو كنت أذكى من آينشتين
القضية يا جماعة.. ماتنسوهاش
يا نهار أبيض ! كل دة رغي ؟؟
طبعا لسه فس خير في البلد
بس مش لينا
للكبار قصدي الحيتان بتاعتة البلد
تحياتي لكي
من زمان اوى ما كتبتيش حاجة يا فندم
اخبار الامتحانات ايه
يارب يكون كله تمام
لكى تاج عندى مررتهولك
ياريت تيجى تخديه
:)
مصر ام الدنيا
بس للأسف احوالها بتدهور يوم بعد يوم
فيها من كل لون يا بطستا
الباشا والوزير والغفير والمعدوووووووووووم
ومحدش بيحس بحد
بنلوم الشاب على السفر طيب هيعمل ايه ؟
اما بقى موضة الهجرة الجديدة دى كل واحد وله اسبابه والله يهدينا للخير
بس بجد موضوعك رائع
Post a Comment